Pinay Spikers ikinasa ang Finals
MANILA, Philippines — Ibubuhos ng Pinay spikers ang buong puwersa nito laban sa Indonesia upang masiguro ang tansong medalya sa paglarga ng
battle-for-bronze match ngayong hapon sa 2019 Southeast Asian Games women’s volleyball tournament sa Philsports Arena sa Pasig City.
Nakatakda ang paluan ng Pilipinas at Indonesia sa alas-3:30 ng hapon na susundan ng championship match ng 11-time champion Thailand at Vietnam sa alas-6 ng gabi.
Hangad ng Pinay spikers na makabalik sa podium matapos ang 14 taon.
Huling nagkamit ng medalya ang Pilipinas noong 2005 edisyon na ginanap sa Bacolod City kung saan nakahirit ng tanso ang koponan.
Ngunit daraan sa matinding pagsubok ang tropa.
Walang naipanalo ang Pinay spikers sa eliminasyon.
Lumasap ang tropa ng fourth-set loss sa Indonesia noong Sabado.
Umaasa ang coaching staff na magiging maganda na ang lagay ni top hitter Alyssa Valdez na nagtamo ng stomach problem para malimitahan ang kanyang produksiyon sa dalawang puntos.
“Talagang pinipilit niyang makalaro kahit may nararamdaman siyang masakit,” ani team captain Aby Maraño.
Kaya naman kailangang kumayod ng husto ng iba pang miyembro ng tropa kabilang na sina open hitters Eya Laure at Ces Molina at opposite spikers Mylene Paat at Jovelyn Gonzaga.
Matibay na blockings naman ang aasahan kina middle blockers Majoy Baron, Maddie Madayag at Maraño habang magsasalitan sina libero Dawn Macandili at Kath Arado sa floor defense.
Tututukan ng Pinay squad ang reception na siyang pangunahing naging problema ng tropa kontra sa Indonesia.
Babantayan ng Pilipinas si Ratri Wulandari na nagtataglay ng pamatay na jump serve. Nakalikom ito ng 18 puntos kabilang ang tatlong aces laban sa Pinay spikers.
Magiging tinik din sina Megawati Pertiwi at skipper Wilda Sugandi na nagsanib-puwersa para makakolekta ng 29 pinagsamang puntos.
- Latest