Didal dinomina ang California event
Tsansa sa Tokyo Olympics lumakas
MANILA, Philippines — Lalo pang pinalakas ni Margielyn Didal ang kanyang pag-asa na makapasok sa 32nd Olympic Games sa Tokyo, Japan sa susunod na taon.
Ito ay nangyari matapos angkinin ni Didal sa ikalawang pagkakataon ang titulo sa Exposure All Women’s Skateboarding Championship na ginanap sa Huntington Beach, California.
Ayon kay Skateboarding and Roller Sports Association of the Philippines president Monty Mendigoria, ang panibagong tagumpay ng Cebuanang skateboarders ay kasunod din ng kanyang panalo sa Ladies Day Skate competition sa Berrics skate park ng Los Angeles, California.
Naniniwala si Mendigoria na sa dalawang magkasunod na panalo ni Didal sa dalawang world class competition, malaki na ang pag-asa nitong makapasok sa Tokyo Olympiad sa kanyang pagsabak sa 2019 Olympic Ranking tournament ngayong Nobyembre 10 sa Rio de Janiero, Brazil.
Inaasahang magtatagpo ang malalakas na skateboarders mula sa iba’t ibang panig ng mundo sa Brazil competition upang pag-aagawan ang slots para sa Tokyo Olympics.
Bukod sa Olympics qualifying tournament pinagtibay din ni Didal ang kanyang asam na dominahin ang 30th Southeast Asian Games skateboarding event sa Tagaytay City sa darating na Nobyembre 30 hanggang sa Disyembre 11, ayon kay Mendigoria.
- Latest
