Kalusugan ni Pacquiao bantay-sarado
MANILA, Philippines — Tinututukan ng coaching staff ang kalusugan ni eight-division world champion Manny Pacquiao para makaiwas sa anumang sakit habang nagsasanay sa Wild Card Gym sa Los Angeles, California.
Pinayuhan ni chief trainer Buboy Fernandez na iwasan muna ni Pacquiao ang ilang gawain na walang kinalaman sa boksing gaya ng basketball.
Ito ay para makaiwas sa anumang injury ang reigning World Boxing Association regular welterweight champion.
At sumusunod naman si Pacquiao na bahagi ng kanyang pagiging disiplinado sa training camp.
“Kailangang mag-ingat. Mabuti naman at sinusunod niya ako sa mga sinasabi ko,” ani Fernandez.
Hinigpitan din ni Fernandez ang pagtanggap ng bisita partikular na ang mga posibleng may sakit gaya ng simpleng ubo o sipon na maaaring makahawa sa Pinoy champion.
Pinakiusapan nito ang mga bibisita na ipagbigay-alam agad kung mayroon silang karamdaman upang makaiwas agad si Pacquiao.
Mas makabubuti na huwag muna aniyang bumisita kung tukoy nang may sakit ang mga ito.
“Bawal kay Manny ang magkasakit. If you’re not feeling well, say, you have fever, cough cold, please refrain from visiting him at baka mahawa pa ninyo siya. Kailangan din na bawasan ang mga bumibisita, iwasan na tumambay na matagal sa bahay para magkaroon ng sapat na pahinga si Manny,” ani Buboy.
Pinaghahandaan ni Pacquiao ang unification bout laban kay Keith Thurman sa Hulyo 21 (Manila time) sa Maynila) sa MGM Grand Garden Arena sa Las Vegas.
- Latest