NorthPort binalasa ang Alaska Aces
MANILA, Philippines — Balanseng opensa ang ipinakita ng NorthPort para ilista ang una nilang panalo.
Ginawa nila ito sa kabila ng hindi paglalaro ni injured star guard Stanley Pringle.
Nakahugot ng double figures mula sa limang players, pinatumba ng Batang Pier ang Alaska Aces, 103-81, sa una nilang laro sa 2019 PBA Commissioner’s Cup kahapon sa Ynares Center sa Antipolo City.
Kumolekta si small forward Sean Anthony ng 22 points, 6 rebounds, 4 assists at 2 steals para banderahan ang NorthPort.
“Without Stanley Pringle, siguro na-challenge lahat ng players na kailangan they have to do their share,” sabi ni Batang Pier coach Pido Jarencio.
Nagdagdag naman sina 6-foot-10 import Prince Ibeh at Robert Bolick ng tig-19 markers kasunod ang 13 at 12 points nina Jonathan Grey at Moala Tautuaa, ayon sa pagkakasunod.
Nabigo naman ang Alaska na mailista ang 2-0 record matapos gibain ang Columbian, 111-98, noong Linggo.
Mula sa 35-35 pagtabla ng Aces ay naghulog ang Batang Pier ng 14-2 bomba para iposte ang 12-point lead, 49-37, sa huling 1:56 minuto ng second period.
Pinalaki pa ng NorthPort ang kanilang kalamangan sa 97-76 galing sa reverse ni Anthony sa huling 2:36 minuto ng fourth quarter.
Samantala, pinatawan ng PBA Commissioner’s Office sina Kelly Nabong at Ronald Tubid ng San Miguel ng multang tig-75,000 bukod sa three-game suspension.
Ito ay dahil sa panggugulo ni ‘Spiderman’ sa Game Five ng title series ng Beermen at Magnolia Hotshots sa 2019 PBA Philippine Cup.
Nakitang sinuntok ni Tubid si Paolo Felizarta, nagbihis ng costume na ‘Spiderman’ at nabangga si June Mar Fajardo sa center court, habang binuntal naman ni Nabong ang napagkamalang kasamahan ni Felizarta.
- Latest