Batang Pier buhay pa
Tsansa ng Texters sa no. 2 seat nadiskaril
MANILA, Philippines — Tinapos ng NorthPort ang hangarin ng TNT Katropa na makuha ang No. 2 berth.
Ito ay matapos bugbugin ng NorthPort Batang Pier ang Tropang Texters, 109-83, sa 2019 PBA Philippine Cup kahapon sa Smart Araneta Coliseum.
Winakasan ng NorthPort ang kanilang anim na sunod na kamalasan para itaas ang baraha sa 3-6 kasabay ng pagpigil sa five-game winning streak ng TNT Katropa.
Ang panalo ang bumuhay sa tsansa ng Batang Pier na makasama sa eight-team quarterfinals.
“Basta kami, one game at a time, hahabulin namin ‘yung playoffs,” sabi ni coach Pido Jarencio.
Tuluyan nang napasakamay ng Rain or Shine Elasto Painters (8-3) ang No. 2 seat, may bitbit na ‘twice-to-beat’ advantage kagaya ng Phoenix Fuel Masters (9-2), sa quarterfinals, dahil sa kabiguan ng Tropang Texters (7-4).
Kumolekta si Stanley Pringle ng 27 points, 9 rebounds at 2 assists, habang may 14 at tig-13 markers sina Sean Anthony, Moala Tautuaa at Paolo Taha, ayon sa pagkakasunod, para sa NorthPort.
Kaagad kinuha ng Batang Pier ang 46-23 abante patungo sa 27-point lead, 53-26, bago ang halftime.
Isang 11-0 bomba naman ang inihulog ng Tropang Texters para makalapit sa 42-53 sa pagsisimula ng third period.
Ngunit muling rumatsada ang NorthPort para itala ang 102-72, mula sa three-point shot ni Nico Elorde.
- Latest