4 na koponan kakaliskisan

MANILA, Philippines — Apat pang koponan ang kakaliskisan sa pagpapatuloy ng 2019 PBA D-League Aspirants’ Cup sa Paco Arena sa Manila.

Magtutuos ang University of Santo Tomas at Batangas-Emilio Aguinaldo Collge sa alas-2 kasunod ang duwelo ng SMDC-National University at Chadao-Far Eastern University sa alas-4.

Masisilayan sa unang pagkakataon sina transferee guard Brent Paraiso at high school star Mark Nonoy suot ang Grow­ling Tigers jersey gayundin si Beninese forward Soulemane Chabi Yo.

Makakasama ng tatlo sina Renzo Subido at Marvin Lee na pangunahing inaasahan ni UST coach Aldin Ayo.

Ito naman ang unang coaching duty ni Oliver Bunyi bilang head coach ng Batangas-EAC.

Kukuha ng lakas ang EAC kina veterans Cedric de Joya at Earvin Mendoza katuwang sina JP Maguliano at Renzo Tampoc.

Sa kabilang banda, umaasa si Bulldogs coach Jamike Jarin na magiging mabangis ang simula ng kanyang bataan dahil nariyan sina Dave Ildefonso at John Lloyd Clemente at si Senegalese big man Issa Gaye.