Ika-3 dikit sa Phoenix
MANILA, Philippines — Tiniyak ng Phoenix na hindi sila magiging ikalawang biktima ng Columbian.
Naisuko man ang itinayong 19-point lead sa first period ay tinalo pa rin ng Fuel Masters ang Dyip, 108-98 para sa kanilang ikatlong sunod na ratsada sa 2019 PBA Philippine Cup kahapon sa Smart Araneta Coliseum.
Humataw si shooting guard Matthew Wright ng 22 points habang kumolekta si Calvin ‘The Beast’ Abueva, nakipagsukatan ng lakas kay No. 1 overall pick CJ ‘The Baby Beast’ Perez, ng 16 markers, 9 rebounds at 3 steals.
Sa kanilang 3-0 record ay sinolo ng Phoenix ang liderato ng torneo habang nalasap ng Columbian ang unang kabiguan matapos gulatin ang four-time champions na San Miguel, 124-118 noong Biyernes.
Nauna nang nakatakas sa overtime ang Fuel Masters laban sa Meralco Bolts, 93-92 at TNT Katropang Texters, 93-84.
Laban sa Dyip ay kaagad itinala ng tropa ni coach Louie Alas ang 24-14 abante sa opening period at pinalaki ito sa 40-21 sa 7:15 minuto ng second quarter.
Napababa ito ng Columbian sa 83-90 agwat mula sa floater ni rookie guard JP Calvo sa 7:06 minuto ng fourth period bago sumaklolo sina Wright, Abueva at LA Revilla para muling ilayo ang Phoenix sa 106-94 sa nalalabing 46.4 segundo.
Sapat na ito para tuluyan nang pataubin ng Fuel Masters ang Dyip.
- Latest