PSC pangangasiwaan na ang paghahanda sa 30th SEAG
MANILA, Philippines — Dahil walang ibinibigay na anumang impormasyon ang Philippine Southeast Asian Games Organizing Committee (Phisgoc) kaugnay sa estado ng paghahanda ng bansa para sa biennial event ay si Philippine Sports Commission chairman William ‘Butch’ Ramirez na lamang ang nagdaos ng isang press conference kahapon sa PSC Building sa Malate, Manila.
“When I come across other people, it’s difficult na dapat nako-communicate ng organizing committee what is going on. People begin to distrust,” ani Ramirez. “As part of Phisgoc and being its second highest officer, I’m concerned being the most veteran among the triumvirate.”
Dahil sa inaasahang pagkakatiwala sa kanila ng pondong P7.5 bilyon para sa 2019 SEA Games ay magiging aktibo ang PSC sa kanilang papel.
“Makikialam ako from the executive director down the line because after all, kami ang magre-release ng pera,” wika ni Ramirez, ang hinirang na Phisgoc vice-chairman.
Ang naturang P7.5 billion budget para sa 2019 SEA Games hosting ay nauna nang itinabi para sa Department of Foreign Affairs dahil si dating DFA Secretary Alan Peter Cayetano ang chairman ng Phisgoc.
Ngunit kamakailan ay inaprubahan ng Senado ang nasabing SEAG budget at ipinagkatiwala sa PSC.
Sinabi naman ni Ramirez na kahit nagbitiw na si Cayetano bilang DFA Secretary para kumandidato sa May elections ay siya pa rin ang tumatayong chairman ng Phisgoc.
Sina Ramirez at POC president Ricky Vargas ang co-chairmen ng naturang SEAG organizing committee.
- Latest
