Pinoy cue masters may laban sa Olympic gold kung...
MANILA, Philippines — Posibleng manggaling sa billiards ang kauna-unahang gintong medalya ng Pilipinas sa Olympic Games.
Kumikilos na ang ilang grupo at personalidad upang itulak ang billiards na mapasama bilang regular event sa Olympics.
Sa katunayan, pormal nang nagsumite ang World Confederation of Billiards Sports (WCBS) ng kahilingan sa International Olympic Committee.
Target ng grupo na maibilang ang billiards sa mga lalaruin sa 2024 edisyon ng quadrennial meet na idaraos sa Paris, France.
Suportado ng billiards association ng host country - ang Fédération Française de Billard (FFB) - ang aksiyon ng grupo.
Kung matutuloy ito, malakas ang tsansa ng Pilipinas na tuluyang tuldukan ang pagka-uhaw ng bansa sa gintong medalya.
Isa ang Pilipinas sa itinuturing na powerhouse country sa mundo ng billiards.
Kasalukuyang hawak ni Carlo Biado ang korona ng World 9-Ball Championship.
Nakasungkit din si Biado ng gintong medalya noong 2017 World Games na ginanap sa Wroclaw, Poland.
Maliban kay Biado, ilang kilalang Pinoy cue masters pa ang gumawa ng ingay sa mga nakalipas na taon.
Itinanghal na ring kampeon sa World 9-Ball sina Efren “Bata” Reyes (1999), Ronnie Alcano (2006) at Francisco “Django” Bustamante (2010).
Sa World 8-Ball Championships, nakahirit din ng korona sina Reyes (2004) at Alcano (2007) gayundin si Dennis Orcollo noong 2011.
Umaariba rin ang Pilipinas sa women’s division kung saan dalawang beses nasungkit ni Rubilen Amit ang Women’s World 10-Ball Championship noong 2009 at 2013.
- Latest
