Cebu Niños nimina'g 11 ka bulawan sa ikaduhang adlaw sa PNG 2018
CEBU, Philippines — Ang Cebu City Niños namawi gikan sa bugnaw nga sugod dihang mikabkab sila og 11 ka bulawang medalya gikan sa nagkadaiyang duwa sa Philippine National Games (PNG) kagahapon nga gipahigayon sa nagkalain-laing dapit dinhi sa Sugbo.
Ang Cebu Niños nimina og unom ka bulawan pinaagi sa athletics diha sa Cebu City Sports Center.
Gipangulohan kini sa Cebuana trackters nga si Jeselou Rebalde nga lumad taga Agusan del Norte ug Riza Jane Valiente sa Mabini, Bohol nga nagkumbinar og tulo ka bulawang medalya.
Si Rebalde nidominar sa 100-meter run senior women's kagahapon ug 200m run niadtong Domingo, samtang si Valiente nanghawod sa 400m hurdles junior women's class.
Wala sab magpabitin ang garbo sa University of Cebu nga si Prince Joey Lee nga maoy nidominar sa 10,000m men's run ug sa 5,000m run sa men's senior division.
Midaog sab og bulawan si Seth Abraham Pilapil pinaagi sa junior men's 200m run.
Gawas sa athletics, ang Cebu Niños mipupo sab og bulawan kortesiya ni Karen Mae Indaya pinaagi sa pagdominar sa 200m backstroke junior girls division didto sa CCSC swimming pool.
Ang Cebu Niños midaog sab og bulawan sa weightlifting event pinaagi sa Joefry Frasco sa 50-kg. class ug Evangelito Dale Ceniza sa 56kg division nga gipahigayon didto sa dakbayan sa Naga.
Duha sab ka arnisadors sa Cebu Niños nga sila si Jackie Tuada ug Dexter Bolambor ang midaog og bulawan pinaagi sa double anyo event.
Sa kinatibuk-an, ang Cebu Niños aduna na'y 14 ka gold uban ang 11 ka silver ug siyam ka bronze medals. (BANAT NEWS)
- Latest