Cignal nasorpresa sa Generika-Ayala
Laro Bukas(Baliwag Sports Center, Baliwag, Bulacan)
4 p.m. Petron vs Smart Prepaid
MANILA, Philippines — Ginulantang ng Generika-Ayala ang paboritong Cignal HD sa bisa ng 26-24, 18-25, 16-25, 25-22, 15-11 come-from-behind win upang magarbong tapusin ang first round ng Philippine Superliga Grand Prix sa The Arena sa San Juan City.
Nagsanib-puwersa sina imports Darlene Ramdin ng Trinidad and Tobago at Symone Hayden ng Amerika para buhatin ang Lifesavers sa ikalawang panalo sa pitong laro.
Nakalikom ang open hitter na si Ramdin ng kabuuang 26 puntos mula sa 23 attacks, dalawang blocks at isang ace habang solido ang suporta ni Hayden sa attack line nang bumanat ito ng 16 markers.
“Darlene is a fighter. She plays her heart out even if she’s in pain. I told the team that we should not commit unforced errors and improve our service-receive. Fortunately, our first ball worked that’s why our set plays became a little unpredictable in the fifth set,” ani Lifesavers head coach Sherwin Meneses.
Nakatulong din sina skipper Angeli Araneta, Fiola Ceballos at setter April Ross Hingpit partikular na sa huling sandali ng laro.
Nahulog ang HD Spikers sa 3-4 baraha.
Matapos ang dalawang mainit na bakbakan sa unang apat na sets, matinding pukpukan ang nasilayan sa fifth set kung saan nagawang maitabla ng HD Spikers ang laro sa 11-all mula sa isang off the block hit ni Sonja Milanovic.
Subalit iyon na lamang ang nakayanan ng Cignal nang humataw ng tatlong cross court attacks si Ramdin kasama pa ang isang service ace ni Araneta para hablutin ng Lifesavers ang panalo sa larong tumagal ng isang oras at 48 minuto.
Humakot si Milanovic ng 35 puntos tampok ang conference-high na siyam na blocks samantalang nagdagdag si Jeane Horton ng 19 puntos para sa HD Spikers.
Hindi nakalaro si middle blocker Marivic Meneses na may academic examination sa University of Santo Tomas.
- Latest
