NLEX kakapitan pa ang solo 2nd
MANILA, Philippines - Pupuntiryahin ng NLEX ang kanilang ikaanim na panalo para patuloy na solohin ang ikalawang puwesto, habang tatlong mahalagang players naman ang hindi maglalaro para sa Meralco.
Bitbit ang 5-1 baraha, lalabanan ng Road Warriors ang Blackwater Elite ngayong alas-7 ng gabi matapos ang salpukan ng Bolts at Phoenix Fuel Masters sa alas-4:15 ng hapon sa pagpapatuloy ng 2017 PBA Governors’ Cup sa Smart Araneta Coliseum.
Minantsahan ng NLEX ang dating malinis na 4-0 kartada ng Meralco matapos kunin ang 100-94 panalo noong Agosto 13.
Ipaparada ng Road Warriors si veteran guard Cyrus Baguio, nahugot nila mula sa isang three-team trade sangkot ang Fuel masters at Globalport Batang Pier, laban sa Elite.
“We need these guys to mentor our young players,” sabi ni head coach Yeng Guiao sa mga dati niyang players sa Red Bull Barako na sina Baguio, Larry Fonacier at Rico Villanueva.
Samantala, hindi naman makukuha ni one-time PBA Grand Slam champion coach Norman Black ang serbisyo ni point guard Baser Amer at ang bagong hugot na si playmaker Mike Tolomia.
Ito ay dahil sa pagtulong nina Amer at Tolomia sa kampanya ng Gilas Cadets para sa 29th Southeast Asian Games sa Kuala Lumpur, Malaysia sa Agosto 19-30.
Bibiyahe ang Gilas Cadets ngayong araw kasama sina Amer at Tolomia para sa pagdedepensa sa korona ng bansa sa men’s basketball competition ng SEA Games.
Itatampok naman ng Fuel Masters si veteran shooting guard Jeff Chan na nakuha nila mula sa Rain or Shine Elasto Painters kapalit ni Mark Borboran at second round draft pick.
- Latest
