1-0 lead pag-aagawan ng Racal at Cignal

MANILA, Philippines -  Mag-uunahan ang Racal at Cignal-San Beda na ma­kuha ang 1-0 bentahe sa pagsisimula ng PBA D-League Finals best-of-three championship series ngayong hapon sa Ynares Sports Arena sa Pasig City.

Nakatakda ang Game One ng serye sa alas-4.

Parehong baguhan ang Tile Masters at Hawkeyes sa Finals kaya naman inaasahang mas magiging pukpukan ang labanan ng dalawa.

Matikas ang Cignal na babanderahan nina San Beda standouts Robert Bolick, Javee Mocon at Davon Potts ka­sama pa sina MVP candidate Jason Perkins at veteran playmaker Pamboy Raymundo.

Paborito ang Hawkeyes dahil sa kanilang 96-86 panalo laban sa Tile Masters sa eliminasyon.

Subalit sinabi ni Cignal coach Boyet Fernandez na hindi dapat maging kampante ang kaniyang bataan dahil binubuo ang Racal ng mga beteranong manlalaro.

“We had a hard time playing Racal. We just have to make the necessary adjustments because what they have very good players, All-Star players at least. So if you’re going to beat an All-Star team, you really have to play defense and be disciplined,” wika ni Fernandez na dinala ang NLEX sa ilang kampeonato sa liga.

Ipaparada ng Racal ang ilang NCAA stars gaya nina Kent Salado ng Arellano University, Sidney Onwubere ng Emilio Aguinaldo College at Rey Nambatac ng Letran.

Nariyan pa sina Tile Masters veterans Jackson Cor­puz at Allan Mangahas na maganda ang ibinibigay na suporta sa kanilang grupo.

“I will just continue to trust my players and we'll try to keep it close and we'll try to motivate the players co­ming to the Finals,” pahayag ni Tile Masters mentor Jerry Codiñera.