Mas mabangis na Generika papalo sa PSL

MANILA, Philippines -  Asahan ang mas mabangis na Generika na nakatanggap ng solidong suporta mula sa Ayala Corporation para sa kampanya nito sa 2017 Philippine Superliga (PSL) Invitational Conference na magsisimula sa Sabado sa The Arena sa San Juan City.

Mapapalaban ang bataan ni national women’s team head coach Francis Vicente sa matitikas na tropa gaya  ng two-time champion Petron, Cignal Foton at Cocolife.

Personal na sinaksihan nina PSL chairman Philip Ella Juico at PSL president Ramon “Tats” Suzara ang launching ng bagong mukha ng Generika kahapon sa Ayala Tower One.

Umaasa ang pamunuan ng Lifesavers na malalampasan nito ang ikalimang puwestong pagtatapos sa PSL Grand Prix noong nakaraang taon.

Makakasama ng Lifesavers sina Angeli Araneta, Carol Cerveza, Bia General at Patty Jane Orendain na dating miyembro ng Foton habang pasok din sa koponan si two-time champion Acy Masangkay na mula sa Petron.

Raratsada rin sina team captain Gen Casugod, Roselle Baliton, Kat Arado, Judith Abil, Rosalie Pepito, Angelica Macabalitao, Yvonne Reyes, Mikaela Reyes, Shirley Salamagos, Shaya Adorador, Angelica Legacion, Maristella Baang, Ynna Pagdanganan at Fiola Mae Ceballos. Sina dating SEAG  gold medalists Mayie Prochina at Nene Chavez ang assistant coaches.