Gulo sa liderato sa Philta naayos na

MANILA, Philippines – Naplantsa na ang gusot sa pamunuan ng Philippine Lawn Tennis Association (Philta) sa pagitan nina Salvador “Buddy” Andrada at Randy Villanueva.

Ito ay matapos magpulong sina International Tennis Federation (ITF) president David Haggerty ng USA at Philippine Olympic Committee (POC) president Jose Cojuangco kahapon sa Century Park Sheraton Hotel.

Magkakaroon muna ng “status quo” bago maitakda ang Philta election sa Enero ng susunod na taon.

Sa status quo ay mananatili si Andrada bilang presidente ng Philta sa holdover capacity  hanggang mahalal ang bagong pamunuan.

“We have to make it sure that it is the best thing that we can do. The ITF won’t dictate you what to do. It’s always your decision. It will be all up to you to start and decide what step to take for the good of tennis,” sabi ni  Haggerty, ang chairman of the board ng United States Tennis Association (USTA) mula noong 1998 hanggang 2010.

Nauna nang nagbitiw si Andrada bilang president ng Philta at ito ang siyang nagbigay daan para sa pagpapatupad ng status quo hanggang sa eleksiyon ngayong Enero.

Tinanggap ni Villanueva at Andrada ang settlement at nagkamayan.

Sinabi ni Andrada na hindi magkakaroon ng eleksyon ang Philta ngayong taon dahil sa nalalapit na halalan sa POC na nakatakda naman sa Nobyembre 25.

Nangyari ang gulo  sa  tennis matapos mag-resigned si Edwin Olivarez bilang presidente noong July 15, 2016 makaraang mahalal na Mayor ng Parañaque noong May national election.

Sabi ni Villanueva na bilang Philta vice-president for international affairs, siya ay may karapatan na umupo bilang presidente kapalit sa nag-retirong si Olivarez.