MANILA, Philippines - Bagamat isang panalo na lamang ang kailangan ng nagdedepensang San Mig Coffee para makamit ang PBA Grand Slam ay hindi pa nila ito basta-basta makukuha.
Sinabi ni head coach Tim Cone na hindi nila puwedeng balewalain ang kakayahan ng Rain or Shine ni mentor Yeng Guiao.
Makikita ito sa iskor sa kanilang best-of-five championship series.
Kinuha ng Mixers ang 104-101 panalo sa Game One bago nakatabla ang Elasto Painters sa Game Two via 89-87 overtime victory.
Nakalapit ang San Mig Coffee sa pinapangarap na Grand Slam matapos angkinin ang 78-69 panalo sa Game Three noong Sabado.
“They compete in every possession. You just continue to battle and can’t take a play off. The moment you do, you’re in trouble,” sabi ni Cone sa Rain or Shine.
Hawak ang 2-1 bentahe, pipilitin ng Mixers na wakasan ang kanilang serye ng Elasto Painters sa pamamagitan ng panalo sa Game Four ngayong alas-8 ng gabi para sa 2014 PBA Governors’ Cup Finals sa Smart Araneta Coliseum.
“You can’t talk about it till it’s done,” sabi ng 56-anyos na si Cone na puntirya ang kanyang ika-18 PBA championship at pangalawang PBA Grand Slam.
Si Cone ang tumulong sa Alaska para masikwat ang tatlong sunod na kampeonato noong 1996.
Kung mananalo ay ang San Mig Coffee ang magiging ikaapat na PBA team na kumuha ng Grand Slam.
Ang Crispa ni legendary coach Baby Dalupan ang unang nanalo ng tatlong sunod na korona noong 1976 season at muli itong nakamit ng Redmanizers noong 1983 sa ilalim ni mentor Tommy Manotoc na tinampukan ni ‘Black Superman’ Billy Ray Bates bilang import.
Ang San Miguel Beer ni Norman Black ang kumopo ng ikatlong Grand Slam noong 1989 kasunod ang Alaska ni Cone noong 1996.
Kumpiyansa naman si Guiao na makakapuwersa sila ng Game Five sa Miyerkules para sa isang ‘winner-take-all’ match.
“We’re down 1-2 but I don’t think it’s the end. I don’t think it’s ending (Monday),” sabi ng 56-anyos na si Guiao.
“We also fell behind 1-2 against Alaska and we won the next two games. We hope to do the same thing here,” dagdag pa nito.