Sangkot sa MRT-3 scam sentensiyado
Naabsuwelto sila noong Oktubre sa tangkang pagkikil ng $30 milyon sa chairman ng Inekon, kompanyang Czech na gumagawa ng tren. Pero noong Pebrero sinintensiyahan ng Sandiganbayan sa korapsiyon ang dating general manager ng MRT-3 at tiyo ng misis niya.
Napatunayang nagkasala si Atty. Al S. Vitangcol III sa pagkontrata sa PH Trams bilang MRT-3 maintenance nu’ng 2012-2013. Isa sa anim na incorporators ng kompanya ang tiyuhin niyang si Arturo Soriano. Nilabag nila ang Anti Graft and Corrupt Practices Act at Procurement Reform Act, pasya ng mga mahistrado.
Dalawang buwan pa lang ang PH Trams at P625,000 lang ang puhunan nang biyayaan ito ni Vitangcol ng $1.15 milyon (P52.5 milyon) kada buwan. Sa 10 buwan, P525 milyon ang hinamig ng kompanya. Wala itong karanasan sa railways. Inagaw lang nito ang technicians, makina, at imbak na spare parts ng naunang maintenance contractor, Sumitomo ng Japan. Nauna ru’n biglang pinalayas ng Dept. of Transport ang Sumitomo nang walang malinaw na rason, matapos ang 12 taong serbisyo bilang tagagawa at maintenance ng MRT-3.
Gulo ang sumunod. Nagkabuluk-bulok ang commuter railway ng Metro Manila. Tatlong beses kada araw, tumitirik ang mga tren dahil sa sirang makina, lumang signaling, at durog na riles. Nagkasunog sa loob ng bagon, nagpepreno nang biglaan, at minsan ay nadiskaril ang tren at binangga ang railings sa end-station. Dose-dosenang beses napilitan bumaba ang mga pasahero sa gitna ng riles, peligroso dahil may mga high-voltage cables sa ulunan nila. Nalugi ang MRT-3 sa malimit na pagsara at soli-pasahe. ‘Yan ang epekto ng korapsyon sa mamamayan.
Sa kolum na ito unang nabunyag ang anomalya. Magpasalamat tayo sa maraming sources na nagbigay ng impormasyon. Mabuhay kayo!
* * *
Makinig sa Sapol, Sabado, 8-10 ng umaga, DWIZ (882-AM).
- Latest
