EDITORYAL - Kampeon ng kalikasan
HINDI malilimutan ang mga sinabi ni Gina Lopez noong Hunyo 2016 nang hirangin siya ni President Rodrigo Duterte na Environment secretary, “I don’t like mining, the foreigners and the rich are the only ones benefitting from it but the farmers and the fishermen suffer.”
Hindi nga niya gusto ang pagmimina sapagkat bukod sa sinisira ang kapaligiran, sinisira rin ang pinagkukunan ng ikabubuhay ng mga magsasaka at mangingisda.
Tinotoo niya ang pag-ayaw sa mining companies. Umabot sa 22 mining companies ang kanyang naipasara at 12 contracts sa pagmimina ang kanyang kinansela sa panahon ng kanyang panunungkulan sa Duterte administration. Ang 22 mining companies ay napatunayang lumabag sa mga itinatakdang batas at bumagsak din sa siltation, soil erosion, dust emission at kawalan ng social at development projects. Napatunayan din na sinisira ng mga ito ang kagubatan.
Hindi naipagpatuloy ni Lopez ang kanyang adbokasiya na mailigtas ang kalikasan laban sa mga mapang-abusong mining companies sapagkat ni-reject siya ng Commission on Appointment (CA) noong 2017. Labing-anim na senador ang bumoto para maalis siya sa puwesto at walo ang pumanig sa kanya. May pait sa tinig ni Lopez makaraang ma-reject, sabi niya, ang interes sa negosyo ang nangibabaw.
Bukod sa paglaban sa iresponsableng mining companies, adbokasiya rin niya ang paglilinis sa maruming Ilog Pasig at mga estero sa Metro Manila. Siya rin ang nagpasimuno sa reforestation ng La Mesa Watershed at sa malawakang pagtatanim ng bakawan sa Palawan.
Noong Lunes, pumanaw na si Lopez sa edad na 65 dahil sa brain cancer. Ganunman, pumanaw siya na mayroong naiwang magandang alaala sa mamamayan --- ang pagmamahal sa kalikasan. Hindi malilimutan ang kanyang pagtatanggol para mailigtas ang kapaligiran laban sa mga gahaman. Alam niya na may karapatan ang bawat Pilipino sa isang malinis at malusog na kapaligiran. Hangarin niyang mawala ang mga humuhukay sa mga bundok at kumakalbo sa kagubatan. Pangarap niyang hindi na magbaha sa darating na panahon.
Hindi malilimutan ang mga ginawa ni Gina Lopez – ang kampeon ng kalikasan.
- Latest