Wala nang saysay

Magsisimula nang lumayag ang Philippine Coast Guard (PCG) sa Benham Rise, isang malaking lugar sa silangang bahagi ng Luzon na sakop ng Pilipinas, matapos malaman na ilang barko ng China ang namataan doon. Inutusan din ni Pres. Rodrigo Duterte ang Philippine Navy na magtayo ng mga istruktura sa Benham Rise, bilang pag-aangkin sa lugar. Wala tayong kakayanan na lumikha ng mga artipisyal na isla tulad ng ginawa ng China sa South China Sea, kaya hindi pa alam kung anong istruktura ang itatayo sa Benham Rise. Ito ang unang pagkakataon na babantayan na rin ng PCG ang Benham Rise. Inaprubahan ng UN na bahagi nga ng Pilipinas ang nasabing lugar. Kaya hindi ko maintindihan ang pahayag ng China na hindi raw puwedeng angkinin ng Pilipinas ang Benham Rise. Sinisita pa ang batas na sila rin ang ayaw sumunod kapag ang South China Sea ang pinag-uusapan. Malaya raw lumayag at lumipad sa Benham Rise. Ano naman kaya ang mangyayari kung magkatagpo ang barko natin at China sa Benham Rise?

Sino pala ang pwedeng umangkin nito, sila? Walang ibang bansa na malapit sa Benham Rise kundi ang Pilipinas. Maliban na lang kung may sasa­bihin na naman ang China na may karapatan sila sa lugar, dahil sa anumang rason o dahilan. Ano nga ba ang ginagawa nila roon, na napakalayo na sa China? May hinala na mayaman ang lugar sa likas na kayamanan. Kaya ba interesado ang China? Kaya ba wala silang pakialam kung sino pa ang umaangkin nito? Kapag sila ang sinita, walang pakialam, pero kapag sila ang nanita, dapat pakinggan?

Hindi nga naniniwala si Defense Sec. Lorenzana na “inosenteng paglalayag” lang ang ginawa ng mga barko ng China sa Benham Rise. Walang malapit na destinasyon na puwedeng puntahan sa lugar, at ilang beses silang tumigil. Nagsalita naman si Duterte hinggil sa isyu, at huwag na raw munang pag-awayan ang soberenya ng lugar dahil maganda na ang relas­yon ng China at Pilipinas. Hindi naman daw kayang labanan ng Pilipinas ang China. Kung ganun, kahit anong gawin ng China sa karagatan ay pababayaan na lang, dahil hindi naman natin kaya? Nagpahayag na nga rin ang China na sila ang may karapatan kung ano ang gusto nilang gawin sa Scarborough Shoal. Parang pinaaalam na may gagawin na nga sila sa Panatag. Wala na talagang saysay ang pinanalunan nating kaso sa Perma­nent Court of Arbitration.