HANDA na si Manila 5th district Rep. Amado Bagatsing sa pagsagupa sa dalawang “higante” sa darating na mayoralty race sa Maynila na sina Mayor Joseph Estrada at ex-Mayor Alfredo Lim. Si Amado ay anak ng isa sa mga naging pinakamatino at malinis na Mayor ng Maynila na si Ramon Bagatsing.
Kinumbinsi si Bagatsing ng kanyang mga miyemro sa KABAKA at mga supporters para kumandidato sa pagka-alkalde. Suportado rin siya ng mga kababaihan ng Maynila kasi, ang bise-alkalde niya ay anak ni dating Manila Mayor na ngayo’y Buhay Partylist Rep. Lito Atienza na si Councilor Ali Atienza.
Sa isang three-cornered fight magkakaroon ng magandang pagpipilian ang mga botante. Marami na rin ang nagsasabi na Lim ay dapat nang magpahinga sa politika sa edad na 88. Yung iba na ayaw kay Erap ay naghihimutok dahil nang manungkulan siya, nagkaroon na ng bayad sa mga public hospitals. Tinaasan din niya ang business at realty property tax bukod sa mainit na isyu sa privatization ng mga palengke. Anyway, tingnan natin kung papaano magdedesisyon ang ating mga kababayan sa Maynila para sa kanilang future at ng kanilang mga anak at apo.
Ang KABAKA o Kabalikat ng Bayan sa Kaunlaran Foundation ay may misyon na tugunan ang mga pangangailangan ng mamamayan ng Maynila sa scholarship at sports program sa mga kabataan, kabuhayan at manpower training para sa mga walang trabaho.
Kapuna-puna ang pagbubuklod ng apat sa malalaking pangalan sa Maynila — ang Bagatsing, Atienza, Lopez, at Ocampo. May plano na rin daw sumama sa kowalisyon si 3rd District Congresswoman Zenaida Angping, asawa ni dating Congressman Harry Angping, matapos na mapagdesisyunang hindi na tatakbo sa pagka Bise-Alkalde. Si 6th District Rep. Sandy Ocampo na kilalang loyal supporter at pamangkin ni Lim ay umanib na rin kay Bagatsing at muling tatakbo sa parehas na posisyon.
Ang kowalisyon ay tinawag na “Ang Bagong Maynila Coalition-Team KABAKA”. Hmm, interesting. Mga dating magkakalaban sa politika, nagsama-sama para kay Amado! Palibhasa mukha kasing napag-iwanan na ng progreso ang Maynila na “Capital City” pa naman ng Pinas. Ano pa kaya ang dahilan ng pagsasanib na ito? Alamin natin sa susunod.