High-tech na plantasyon ng marijuana sa condo unit, nabuko
US Air Force officer, 1 pa timbog
MANILA, Philippines — Timbog ang isang retiradong United States Air Force officer at kaniyang kasamahan makaraang salakayin ng pulisya ang kaniyang condominium unit sa Taguig City na nagresulta sa pagkakadiskubre ng kaniyang ‘high-tech’ na plantasyon ng Kush marijuana Huwebes ng hapon.
Kinilala ang ina-resto na si Raul Antonio Cisneros, 36, at live-in partner niyang si Meljie Maquiling, 28, kapwa nanunuluyan sa Royal Palm Residence Acacia Estates sa Brgy. Ususan, Taguig. Sa rekord ng pulisya, dati nang naaresto si Cisneros ng mga awtoridad noong 2019 dahil sa pagtutulak ng mga party drugs.
Sa ulat ng pulisya, unang inginuso si Cisneros ng mga ‘tulak’ ng Kush na naaresto sa Taytay, Rizal na siyang pinagkukunan nila ng suplay. Naki-pag-koordinasyon ang Taytay Police at Rizal Provincial Police Office sa National Capital Regional Police Office (NCRPO) at Taguig City Police kaya naikasa ang buy-bust operation.
Isang asset ng pulisya ang bumili ng tatlong plastic sachet ng marijuana sa mga suspek sa halagang P5,000. Hindi na nakapalag ang mga suspek nang ipatupad ng mga pulis ang pag-aresto sa kanila.
Sa pagpasok sa condominium unit, dito bumungad ang plantasyon ni Cisneros na gumagamit ng mga aparato, UV lights at ventilation equipments para hindi makalabas ang amoy ng marijuana.
Aabot sa 137 tanim ng marijuana na nakapaso sa tatlong kuwarto sa ikaapat na palapag ng condominium bldg ang nakumpiska ng mga pulis. Aabot sa P2.2 milyong halaga ng iligal na droga at equipments ang kinumpiska ng mga awtoridad.
Nakaditine ngayon ang dalawa sa Taguig City Police Station Detention Center at nahaharap sa kasong paglabag sa RA 9165 o Comprehensive Da-ngerous Drugs Act of 2002 sa Taguig City Prosecutor’s Office.
- Latest