5 kabataan na sumunog sa lobo ng vendor, sumuko
MANILA, Philippines — Sumuko kahapon ang lima sa pitong suspek na sangkot sa pagsunog sa tinitindang lobo ng isang 28-anyos na vendor na kanyang ikinasugat noong Pebrero 12 sa Pandacan, Maynila.
Kasama ang kanilang mga magulang, humarap kay Manila Mayor Isko Moreno ang limang kabataang suspek habang dalawa pa ang pinaghahanap.
Ang mga ito ay pawang miyembro ng ‘True Life Gangsta’ na may paso sa palasinsingan at mga out-of-school youth.
Nag-viral ang video nang panununog ng mga suspek sa tinitindang lobo ni Oliver Rosales sa Pandancan, Maynila. Nagtamo ng 2nd degree burn si Rosales.
Susuriin muna ng Manila Department of Social Welfare kung dapat nang ilipat ang apat na menor-de-edad sa Manila Youth Rehabilitation Center.
‘Yang joke, joke, joke niyo, maaari pala tayong makapaminsala... Gusto ko nga ‘pahawak din sa kanila ‘yung lobo, pero labag sa batas iyon,” ani Moreno .
Bagamat nakakapanggigil umano ang ginawa ng mga suspek, sinabi ni Moreno na kailangan pa ring dumaan ang mga ito sa due process.
Isa sa mga menor-de-edad ang nagsisisi dahil hindi umano nila inakala na may masasaktan.
Sinermunan din ni Moreno ang mga magulang ng mga suspek dahil sa kapabayaan ng mga ito at nasasama sa maling barkada.
- Latest