Traffic enforcer, towing company kinasuhan ng carnapping, extortion

MANILA, Philippines — Kasong carnapping at robbery extortion ang kinakaharap ngayon ng  may-ari ng RWM Towing Services, caretaker at isang traffic enforcer ng Manila Traffic and Parking Bureau matapos ireklamo ng may-ari ng isang truck na kanilang ini-impound kamakailan sa MTPB impounding area sa may Quezon Boulevard, Central Market, Sta.Cruz,Maynila. 

Una nang inaresto ng mga tauhan ng Regional Special Operations Unit (RSOU), ng NCRPO (Extortion) si Rolando Toquero, alyas Roy, 39, caretaker, tubong Iligan City, at stay-in sa MTPB impounding area dakong alas-8:15 ng gabi sa nabanggit na lugar. 

Kasama ring kinasuhan sina Romy Maniquez, umano’y may-ari ng RWM Towing Services at isang T/E Maloy (TNU), na nanatiling hindi pa naaresto. 

Nag-ugat ang pagsasampa ng kaso dahil sa reklamo ni Teodorico Gervacio, may-ari ng isang 10- wheeler truck, dahil sa panghihingi sa kanya ng lagay kapalit ng ini-impound niyang sasakyan. 

Sa imbestigasyon noong Hunyo 14, 2019, minamaneho umano nj Jhuren Galvez,  driver ng Isuzu 10-wheeler nang parahin siya ni Maloy dahil sa paglabag umano sa batas trapiko matapos nitong tumawid kahit naka-red light at dahil sa pàgmamaneho ng walang lisensiya. 

Ipinakita umano ni Galvez ang kanyang Ordinance Violation Receipt (OVR) na inisyu ng Bacoor, Cavite Traffic Management Department noong Hunyo 11,2019. 

Kasunod nito ineskortan siya ni Maloy sa impounding area pero hindi siya inisyuhan ng Ordinance Violation Receipt (OVR). 

Pagsapit sa RWM To­wing Services Impounding area, inatasan siya ni Toquero na maghanda ng P10,000 para mailabas ang truck, at sa pangambang lumaki pa ang babayaran ­nakipagnegosasyon kay Toquero si Gervacio kung saan natawaran ito ng P8,500.

Kasunod nito,nagreklamo na si Gervacio sa RSOU, NCRPO at ikinasa ang entrapment operation.

Kaagad na inaresto si Toquero nang tanggapin ang marked money at dinala sa RSOU.