Brigada Eskwela, nabulabog sa rambol
MANILA, Philippines — Isang lalaking estudyante ang sinaksak nang magrambulan ang grupo nito at kalabang grupo sa isinagawang Brigada Eskwela sa isang public high school sa Caloocan City, kamakalawa.
Sanhi ng saksak sa ulo at leeg, ginagamot ngayon sa Dr. Jose N Rodriguez Memorial Hospital ang biktimang si John Archie Reyes.
Kaagad namang tinurn-over ng Caloocan City Police sa barangay ang suspect na nakilalang si alyas Jay, 17-anyos.
Lumalabas sa report, naganap ang insidente alas-2:30 ng hapon sa Tala High School, Brgy. San Isidro, Tala ng naturang lungsod.
Nabatid na nakilahok ang grupo ng biktima sa programa ng DepEd na Brigada Eskwela, gayundin ang grupo ng suspect.
Ngunit nagkaroon ng argumento ang dalawang grupo na nauwi sa rambol na naging sanhi upang saksakin ang biktima.
Matapos ang insidente ay kaagad na nagpulasan ang grupo ng biktima at grupo ng suspect at dito na nasakote si alyas Jay at ang biktima naman ay mabilis na dinala ng rescue team sa nasabing ospital.
Iniimbestigahan pa ng barangay ang pinagmulan ng rambulan.
- Latest