Negosyante itinumba ng tandem
MANILA, Philippines — Patay ang isang negosyante makaraang barilin sa ulo ng riding in tandem sa Malabon City, kamakalawa ng hapon.
Agad na nasawi ang biktimang si Rolando Ruado, 46, ng Interior Sanciangco St., Brgy. Catmon ng naturang siyudad.
Sa pagsisiyasat ng Malabon City Police naganap ang insidente alas-3:30 ng hapon sa kahabaan ng M. H Del Pilar, Brgy. Maysilo.
Sakay ang biktima sa kanyang minamanehong service tricycle kasama ang anim na menor-de-edad at habang binabagtas nila ang lugar, nang harangin ang mga ito ng mga suspect na sakay ng isang motorsiklong walang plaka.
Bumunot ng baril ang nakaangkas at binaril sa batok ang biktima sa harap ng kanyang mga kasamang menor-de-edad na naging sanhi ng agaran nitong kamatayan.
Bago mabilis na tumakas ang mga suspect sa hindi matukoy na direksyon.
Sa pahayag naman ng asawa ng biktima na si Josephine sa mga police investigators, wala siyang alam na kaaway ang kanyang mister maliban sa isang pulis-Navotas na naka-argumento nito noong December 31, 2018.
Patuloy pa ang isinasagawang imbestigasyon sa insidente.
- Latest