Cook ng bar, umawat sa away: Niluluto naiwan, sunog sumiklab
MANILA, Philippines — Isang bar ang nilamon ng apoy matapos umanong maiwan ng cook ang niluluto nito sa kusina nang umawat sa away ng dalawang kostumer na nagselosan dahil sa isang waitress, kahapon ng madaling araw sa Parañaque City.
Lumalabas sa report ng Parañaque City Bureau of Fire, alas-3:55 kahapon ng madaling araw nang sumiklab ang sunog sa ‘Terminal Flight 1925 Bar and Grille’, na matatagpuan sa Quirino Avenue, Brgy. Baclaran ng naturang siyudad.
Nabatid sa report, na nagbugbugan at nagbasag ng bote ang dalawang lalaking kostumer na hindi na pinabanggit ang pangalan dahil sa isang waitress.
Habang umaawat ang staff ng bar kabilang ang cook ay dito na sumiklab ang apoy hanggang sa kumalat ito.
Nabatid sa ilang tauhan ng bar, na posibleng nagsimula ang sunog nang maiwan ng cook ang niluluto nito sa kusina, gayunman posible ding electrical wiring ang sanhi ng apoy dahil una itong napansin sa kisame, ayon sa ilang staff.
Alas-4:38 ng umaga tuluyang naapula ang apoy. Iniimbestigahan pa rin ng mga awtoridad ang insidente.
- Latest
