Sekyu durog sa trak
MANILA, Philippines — Patay ang isang security guard habang sakay ng mountain bike nang mabunggo at masagasaan pa ng dump truck habang binabaybay ang President Quirino Avenue kanto ng Jesus st., sa Pandacan, Maynila kahapon ng umaga.
Dead-on-arrival sa Ospital ng Sampaloc ang biktimang si Rolando Ginete, nasa hustong gulang, empleyado ng RN Security and Investigation Agency at residente ng 119 Proviner St., Harrison, Malate, Maynila.
Arestado naman ang driver ng dump truck na ‘for registration’ ang plaka na si Ramil Castro Magalona, 25, ng Pulong Sampaloc, Doña Remedios Trinidad, Bulacan habang nasa kostudya rin ng Manila Traffic Bureau ang kasama nito na si Jaypee Colim, 30, driver ng 262 Brgy. Malamig St., Bustos, Bulacan, matapos iturn-over ng Lacson Police Community Precinct.
Kapwa nagmamaneho pa-northbound ang biktima at ang suspek dakong alas-6:00 ng umaga kahapon nang habang nasa kanang bahagi ng inner most lane ang biktima ay nasagi ito ng dump truck. Nang bumagsak sa kalye ang biktima ay nasagasaan pa sanhi ng matinding sugat sa ulo.
Nagtangkang tumakas ang driver na si Ginete subalit hinabol siya mga nakasaksing motorista at nang makorner ay ipinaaresto kina PO1 Romeo Gunce at PO1 Paul John Rupinta ng Lacson PCP nang makarating ang habulan sa G. Tuazon st., sa Sampaloc, Maynila.
Sinubukan pang isalba ang biktimang nang respondehan ng MMDA Road Emergency team na pinangunahan ni Carmelita Momblanco subalit DOA na siya, ayon kay Dra. Grace Dioso ng Ospital ng Sampaloc. (With trainee Vanessa Lenn Galuza)
- Latest