MANILA, Philippines — Patay ang dalawang sakay ng isang scooter makaraang sumalpok sa isang rumaragasang van, kahapon ng madaling araw sa Malabon City.
Nakilala ang mga nasa-wi na sina Joselito Galang, Jr., 47, at Famous Garcia, 41.
Arestado naman at nahaharap sa kasong double homicide through reckless imprudence si Eufemio Obrero, Jr., 47.
Sa ulat ng Vehicular Traffic Incident Investigation Unit ng Malabon City Police, naganap ang insidente dakong ala-1:30 ng madaling araw sa kahabaan ng Gov. Pascual Street sa Brgy. Potrero, ng naturang lungsod.
Minamaneho ni Garcia ang kanyang Yamaha Mio scooter at angkas si Galang na kapwa patungo ng Monumento nang salpukin sila ng Mistubishi L300 FB van na minamaneho naman ni Obrero makaraang bahagyang kainin ng behikulo ang bahagi ng lane na scooter.
Kapwa tumilapon ang dalawang biktima at napailalim pa sa van na nagresulta sa malulubhang pinsala. Nirespondehan ng mga tauhan ng Bureau of Fire Protection (BFP) ang insidente at isinugod sa Tondo Medical Center ang dalawang biktima ngunit kapwa hindi na umabot ng buhay.