Hatol ng PNP-IAS vs Col. Marcos, et al inilabas na!

MANILA, Philippines - Kumpiyansa si Philippine National Po­lice (PNP) Chief P/Director General Ronald “Bato’’ dela Rosa na irerespeto ni Pangulong Rodrigo Duterte ang hatol at rekomendasyon ng PNP-Internal Affairs Service (PNP-IAS) sa kaso laban sa 19 mga opisyal at tauhan ng pulisya na sangkot sa raid sa jail facility na ikinamatay ni dating Albuera, Leyte Mayor Rolando Espinosa.

Sinabi ni dela Rosa na nilagdaan na niya ang rekomendasyon sa naging re­sulta ng imbestigasyon ng PNP-IAS sa kasong administratibo laban kina dating Criminal Investigation and Detection Group (CIDG) 8 Chief P/Supt. Marvyn Wynn Marcos at 18 iba pa.

Ang CIDG team ni Marcos ay akusado matapos na masawi sa raid sa Sub Provincial Jail ng Baybay City, Leyte si dating Mayor Espinosa at ang drug suspect inmate na si Raul Yap noong Nobyembre 5, 2016.

Sinabi ni dela Rosa na kabilang sa rekomendasyon ng IAS  ay pagsibak sa serbisyo, pagkakasuspinde at demosyon.

“I signed it already but it’s hard to make statement I might be mistaken on who were recommended demoted or suspended,” pahayag ni dela Rosa.

Idinagdag pa nito na ipinatupad ng PNP ang tamang proseso sa paglilitis sa kaso laban kina Supt. Marcos at mga tauhan nito.

Aminado naman si dela Rosa na kay  Pangulong Duterte bilang Chief Executive  nakasalalay ang kapalaran nina Marcos.

“Ultimately, everything under the exe­cutive department, the final reckoning is the President all of us under the executive department is answerable to him,” anang opisyal.

Magugunita na sinabi ni Pangulong Duterte na patatawarin niya ang grupo nina Marcos kapag nahatulan ang mga ito ng guilty sa pagkamatay ni dating Mayor Espinosa at ipo-promote pa sa serbisyo.