Mag-live-in niratrat sa loob ng bahay
MANILA, Philippines - Pinaniniwalaang may kinalaman pa rin sa iligal na droga ang ginawang pamamaril at pamamaslang sa isang pinaghihinalaang ‘tulak’ at sa kinakasama nitong babae sa loob ng kanilang bahay sa Malabon City, kamakalawa ng gabi.
Nakilala ang mga nasawi na sina Fernando Lorenzo at Ronalyn Sabala, ng A. Mabini Street, Brgy. Concepcion, ng naturang lungsod.
Sa ulat ng Malabon City Police, naganap ang pamamaril dakong alas-10:05 ng gabi sa loob ng bahay ng mga biktima. Kumakain ng hapunan sina Lorenzo at Sabala nang pasukin ng mga armadong lalaki at pagbabarilin ang mga biktima.
Agad na nasawi si Lorenzo dahil sa mga tama ng bala sa ulo at katawan habang nalagutan ng hininga sa loob ng Pagamutang Bayan ng Malabon si Sabala dahil sa tama ng bala sa likod at sa kanang hita.
Ayon sa mga kaanak ni Lorenzo, pinayuhan na umano nila ito na tumigil na ito sa pagtutulak ng droga ngunit nagmatigas ito. Posible umano na may onsehan na naganap kaya nilikida si Lorenzo at nadamay pa ang kinakasama.
- Latest
