MANILA, Philippines - Sabog ang ulo ng isang hindi nakikilalang lalaki makaraang pagbabarilin at mapatay ng dalawang suspect na armado ng kalibre 9mm na baril sa lungsod Quezon kamakalawa.
Ayon sa ulat ng Criminal Investigation and Detection Unit ng Quezon City Police, ang biktima na walang pagkakakilanlan ay isinalarawan sa pagitan ng edad 25-30, walang saplot pang-itaas, nakasuot ng short pants, at nakatsinelas.
Ayon sa pulisya, nangyari ang insidente sa may kahabaan ng Salvia St., St. Dominic 12, Brgy. Kaligayahan, ganap na alas-9:20 ng gabi.
Sa pagsisiyasat ng Scene of the Crime Operations (SOCO) narekober sa lugar ang dalawang basyo ng kalibre 9mm.
Ang biktima ay nagtamo ng mga tama ng bala sa ulo at sugat sa kaliwang mata. Patuloy ang imbestigasyon ng pulisya sa nasabing insidente.