Alvarez namumuro sa ‘sedition, rebellion’
MANILA, Philippines — Pinaiimbestigahan na ng Department of Justice (DOJ) si Davao del Norte 1st District Rep. Pantaleon Alvarez upang matukoy kung maaari ba itong sampahan ng mga kasong sedisyon, inciting to sedition, o maging ng rebelyon matapos na manawagan sa mga pulis at military na bawiin na ang suporta kay Pang. Ferdinand Marcos Jr..
“I have ordered an investigation on the statements of Congressman Pantaleon Alvarez to determine whether it has risen to the level of Sedition, Inciting to Sedition or even Rebellion,” ayon kay Justice Secretary Jesus Crispin Remulla.
Kasabay nito, pinaalalahanan din naman ni Remulla si Alvarez, na bilang isang mambabatas, ay dapat itong umakto nang naaayon sa pinakamataas na standard ng ethics, morality at nationalism.
Dapat din aniyang iwasan nito ang mga pahayag na hindi angkop para sa isang miyembro ng Kamara.
Nauna rito, sa isang rally sa Tagum City nitong weekend ay nanawagan si Alvarez sa mga pulis at military na i-withdraw ang kanilang suporta sa pangulo.
- Latest
