Rollback sa oil tax hingi

MANILA, Philippines — Hinamon ni Sen. Bam Aquino ang pamahalaan na kumilos na at i-roll back ang excise taxes sa produktong petrolyo sa ilalim ng tax reform program nito upang maalis ang pasanin ng mataas na presyo sa taumbayan lalo na sa mahihirap.

“Nalulunod na ang mga Pilipino sa taas ng mga presyo. Huwag na nating hintayin na tumaas lalo ang bilihin,” ayon kay Sen. Bam, isa sa apat na senador na tumutol sa ratipikasyon ng Tax Reform for Acceleration and Inclusion (TRAIN) Law.
”Aantayin pa ba nila ang 2019? Hindi pa ba aaksyon ang pamahalaan?” 

Ginawa ni Bam ang pahayag matapos ideklara ng Department of Energy (DOE) na pinapayagan ng TRAIN Law ang agarang suspensiyon sa excise taxes sa produktong petrolyo.

Ngunit sinabi ng DOE na saklaw ng suspensiyon ang dagdag na excise tax sa 2019.