MANILA, Philippines – Hiniling ni Senador Ramong “Bong” Revilla sa Sandiganbayan First Division na payagan siyang makadalo sa huling tatlong araw ng sesyon ng Senado sa susunod na linggo.
Sa 2-pahinang resolusyon, sinabi ni Revilla na dakong alas-3 ng hapon sa Hunyo 6,7 at 8 niya nais niyang dumalo sa sesyon sa Senado.
Sa ganitong paraan, iginiit na matatapos at maisasara niya ang kanyang termino bilang isang senador. Si Revilla ay kasalukuyang nasa ikalawa at huling termino na sa Senado.
Nais din umano niyang siguruhin ang maayos na transition sa kanyang tanggapan.
Matatandan na maging si Senador Jinggoy Estrada ay naghain din ng kahalintulad na mosyon sa Sandiganbayan noong nakaraang linggo.
Ang dalawang senador ay parehong nakakulong sa Camp Crame dahil sa kinakaharap na kaso kaugnay sa bilyong pork barrel scam.