2-M jobs kaya ko - Grace
MANILA, Philippines - Nanindigan si presidential bet Grace Poe na hindi “drowing” at “kathang-isip” ang kanyang pangako na magbigay ng isang milyong trabaho kada taon upang labanan ang kahirapan na aniya’y “ugat” ng krimen sa bansa.
“Kaya kong lumikha ng P1 milyong trabaho taun-taon”, wika ni Poe sa mga patutsada ng mga kalaban na ang kanyang agenda ay hindi kayang gawin ng kandidato.
Ayon kay Poe, agad pagtutuunan ng kanyang administrasyon ang pagresolba sa mga problemang kinakaharap ng mga ‘SMEs’ (small and medium enterprises), agrikultura, turismo at ‘manufacturing’ na kaya umanong makalikha ng higit 1.7 milyon, o halos 2 milyong trabaho, kada taon.
Para sa mga SMEs, inihayag ni Poe na pabibilisin niya ang proseso ng pagbibigay ng tulong-pinansiyal sa mga ito upang higit na sumigla ang sektor. Sa pag-aaral, higit 99 porsiyento ng mga negosyo sa bansa ay nasa hanay ng SMEs na siyang lumilikha ng halos 61 porsiyento ng mga bagong trabaho.
Aabot naman sa P300 bilyon kada taon ang ilalaan ng kanyang ‘Gobyernong May Puso’ sa agrikultura habang magiging libre na ang irigasyon para sa mga magsasaka at gagawing ‘climate-resilient’ ang mga postharvest facilities kasabay ng pagtatayo ng mas maraming agro-industrial zones.
Susuportahan din ng kanyang gobyerno ang muling pagpapalakas ng manufacturing sector “sapagkat kung dumami ang ‘Made in the Philippines,’ mas maraming trabahong malilikha, ani Poe.
- Latest
