MANILA, Philippines – Ginawaran kahapon ng katangi-tanging parangal ng Philippine National Police ang mga opisyal na bumubuo sa PNP-Board Inquiry (PNP-BOI) na naglahad ng katotohanan sa engkuwentro noong Enero 25 sa Mamasapano, Maguindanao na ikinasawi ng 44 Special Action Force (SAF) commandos.
Sa PNP-BOI report ay tinukoy dito na binalewala ni Pangulong Benigno Aquino ang Chain of Command ng PNP nang bigyan nito ng go signal ang noo’y suspendidong si PNP Chief Director General Alan Purisima para pamunuan ang Oplan Exodus kung saan ang nasibak na si SAF commander Getulio Napeñas ang nagsilbing ground commander sa operasyon.
Nanguna sa mga tumanggap ng parangal ay sina Director Benjamin Magalong bilang Chairman ng PNP-BOI, Director Catalino Rodriguez, Vice Chairman ng BOI, Chief Supt. John Sosito bilang miyembro at maging ang audit team nito.