Acting vice mayor “Digul” Gullas maoy nangu sa sesyon sa Talisay

CEBU, Philippines — Dili na bag-o alang kang konsehal Eduardo “Digul” Gullas III nga maoy mangulo sa pagpahigayon og session.

Kini maoy iyang gibutyag sa dihang siya ang milingkod isip acting vice mayor sa siyudad sa Talisay.

Matud pa ni Gullas nga nagsige na siya og pahigayon sa session ilabi na nga mobakasyon si bise mayor Richard Francis “Choy” Aznar.

Wa siyay nakita nga problema sa pagdumala sa panagtapok sa iyang mga kauban nga konsehales.

Sulod sa usa ka semana nga acting vice mayor si Gullas human ang iyang maguwang nga si mayor Gerald Anthony “Samsam” Gullas naka leave pa gumikan sa gihambin niini nga balatian.

Una niini, si mayor Gullas nipahibawo nga di una siya makapakita sa Talisaynon tungod kay nagpa alim pa siya sa iyang sakit nga mild pneumonia, infection sa tutunlan ug gagmay nga bato sa kidney.

Iyang gitugyan ang Talisay ngadto ni acting mayor Aznar ug sa iyang manghud nga si acting vice mayor Digul Gullas. (BANAT NEWS)