Duha ka aksidente, 2 patay

CEBU, Philippines — Duha ang namatay sa duha ka managlahing aksidente nga naglambigit og motorsiklo sa miaging Lunes sa kaadlawon.

Ang unang aksidente nahitabo sa national highway sa Barangay Yati  sa Lungsod sa Liloan  alas-12 pasado sa Lunes sa tungang gabii. Ang biktima giila ni Police Major Eric Gingoyon,  hepe sa Liloan Police Station nga mao si Deney Agabe Carado, 34, taga Barangay Looc sa Siyudad sa Mandaue.

Matud pa ni Gingoyon, paingon sa Siyudad sa Mandaue ang biktima luwan sa iyang motor sa dihang kalit lang kining nabangga sa Mitsubishi Montero nga nag-parking sa daplin sa karsada.

Tungod sa kakusog sa pagbangga  nalabay ang biktima ug nakabaton og grabeng kadaut sa iyang kalawasan, dali kining gidala ngadto  sa Danao Provincial Hospital apan gideklarar sa mga doktor nga dead on arrival.

Patay  sab ang usa ka 24-anyos nga tinun-an human kini nadasmagan og bus sayo sa kaadlawon adlaw nga Lunes sa may MC Briones St. Barangay Jagobiao, Mandaue City.

Ang nakalas naila nga si Mark Anthony Mabayo, taga Villa Bonita Subdivision sa Jugan, Consolacion ug driver sa Yamaha Motorcycle.

Samtang ang driver sa bus mao si Rodney Juanillo, 49, taga Cambado 2 Tabogon Cebu.

Base sa initial nga imbestigasyon sa kapulisan ang tinun-an nagbiyahe kini sa.MC Briones St. padulong sa Consolacion sa dihang naigo kini sa bus nga nagbiyahe sa MC Briones padulong sa Pacific Mall.

Ang tinun-an nakaangkon og kadaut sa iyang kalawasan ug gidala sa tambalanan apan gideklarar kining patay.

Matud pa sa tigpamaba sa MCPO Police Lt. Col Mercy Villaro,  nawagtangan sa kontrol ang driver sa Ceres bus maong nisulod kini sa pikas nga lane ug nasugatan ang biktima.

Ang driver sa maong Bus, nagtingkagol na kini sa lock-up Jail ug gipaabot ang pagpasang-at ug tukma nga kaso. (BANAT NEWS)