Vice, todo pakilig kahit malayo sa asawa

MANILA, Philippines — Nag-trending kahapon ang It’s Showtime host na si Vice Ganda dahil sa pagpapakilig nila ng asawang si Ion Perez.

Damang-dama ang pagka-miss nila sa isa’t isa na base sa kanyang post - kasalukuyang nasa Canada si Vice para sa kanyang concert tour na VGful na gaganapin sa United States at Canada ngayong April.

Nagsimula ang pagpapakilig nila nang magkomento si Ion sa pinost ni Vice na kanyang litrato na “MAHAL KITA (na may kasamang mga kiss emoji)” na sinagot naman ni Vice ng “KALUGURAN DAKA! (at mga heart emoji)” na ang ibig sabihin ay ‘I love you’ sa Kapampangan.

Hindi pa doon nagtatapos ang kasweetan nila at pinakitang hindi naging hadlang ang pagiging malayo nila sa isa’t isa. Habang nasa isang teppanyaki-style restaurant ito, tila nag-request ito sa chef at ginawang hugis “ION (heart) VG” ang kanilang pagkain.

Lalong kinilig ang fans dahil effort na effort daw talaga ang misis ni Ion kahit hindi sila magkasama.

Kailan lang ay pinakilala nila ang kanilang ‘baby daughter’ na isang black and white Pomeranian na nagkakahalagang P380,000.

Gusto na raw talaga nilang magka-baby para lalong sumaya ang bahay nila kung saan meron na silang lalambingin, mamahalin at aalagaan.

“Gusto naming magka-baby para lalong sumaya ‘yung bahay namin, para may mapag-sharean ng saya ‘tas mayroon magpapasaya sa’ming bago.

“Mayroon kaming lalambingin, mayroon kaming mamahalin, aalagaan, para lalong maging masaya ang life.”

Hindi pa nila nilalantad ang pangalan ng kanilang ‘baby daughter,’ at ina­abangan din ang magaganap na binyag nito at kung sino ang mga kukunin nilang ninang.