HALATANG-HALATA na ang mga pulitiko maging ang mga indibidwal na kanya-kanya nang kampihan para sa 2016 presidential elections.
Maging ang mga kilalang abogado o election lawyer at mga political analyst ay mahahalata na kung sino ang kanilang kinakampihang kandidato sa eleksiyong pangpanguluhan.
Isa sa aking nahalata ay ang election lawyer na si Atty. Romulo Macalintal na tila abogado ni Sen. Grace Poe.
Sa mga legal opinion ni Macalintal ay idinedepensa nito si Poe sa usapin ng citizenship lalo na nang magpahayag si Senate Electoral Tribunal chair at Supreme Court Senior Associate Justice Antonio Carpio na lumilitaw na naturalized at hindi natural born Filipino si Poe.
Dapat alam ni Macalintal na ang anumang pahayag ni Carpio ay opinyon lamang at ang buong miyembro ng SET ang maglalabas ng desisyon.
Maging itong partylist representative na si dating Justice Secretary Silvestre Bello III ay nais mag-inhibit si Carpio sa SET dahil sa may kaugnayan ito kay Atty. Nonong Cruz na abogado ni Mar Roxas.
Kung mangyayari ito, dapat din palang mag-inhibit ang mga kapwa senador ni Poe na miyembro ng SET lalo na si Sen. Tito Sotto. Lantaran itong pumapabor sa kandidatura ni Poe at ang ibang kasamahan sa Senado.
Wala namang masama na magkampihan na at sumuporta na ng lantaran sa mga kandidato. Pero huwag nang magkubli sa mga kunwaring sila ay nasa gitna at walang kinakampihan.
Kung walang pansariling interes ang mga ito, ngayon pa lang ay agad ng magdeklara o mangako sa publiko na hindi sila ttanggap ng anumang posisyon sa gobyerno kung sakaling palarin ang kinakampihang kandidato.