Lider, miyembro ng ‘transgender’ kidnapping group, naaresto

MANILA, Philippines — Isang lider at isang miyembro ng notoryus na Warla Kidnapping Group ang inaresto ng mga otoridad sa Brgy. Tetuan, Zamboanga City.

Sa bisa ng warrant of arrest na inilabas ng korte sa kasong Kidnapping for Ransom with Serious Illegal Detention, inaresto ng mga tauhan ng CIDG ang lider ng grupo na si alyas “Mikey” at kasamahan nitong si alyas “Nilben”.

Ito ay may kaugnayan sa kinasangkutan ng grupo sa kasong pagdukot sa mga foreign national partikular sa isang Taiwanese national na nasagip ng mga otoridad noong Set­yembre 2022 sa Pa­rañaque City na nagresulta naman sa pagkakaaresto ng lima nilang miyembro ng naturang grupo.

Ayon sa CIDG, ang Warla Group ay binubuo ng mga magagandang transgender women na nag-ooperate sa Southern part ng Metro Manila.

Dito ay  dinudukot ng grupo  ang kanilang mga nakaka-date na kadalasan ay empleyado ng POGO at mga negosyante.

Hinihingan umano ng mga suspek ng pera ang pamilya at kaibigan ng mga biktima kapalit ng kalayaan ng mga ito na ginagamit naman nila sa kanilang sex reassignment surgery o “sex change”.