Limpak na pera natagpuan ng MMDA traffic enforcers

MANILA, Philippines — Nanawagan kahapon ang pamunuan ng Metropolitan Manila Development Authority (MMDA) sa sinumang may-ari ng malaking halaga ng ­“unattended cash” na natagpuan ng mga traffic enforcer.

Inanunsyo ni MMDA chairmain Don Artes na ang malaking halaga ay itinurn-over ng mga traffic enforcer kaya’t maaring makuha ito sa kanilang opisina sa Pasig City.

“Kami po ay nananawagan doon sa nawalan ng pera na magpunta po personally sa aming tanggapan. Kailangan make sure alam ninyo po ang detalye nitong pera na ito. Saan siya nakalagay magkano, ano ang kasama doon sa pinaglalagyan, saang lugar, anong oras,” ani Artes.

Gayunman, may babala si Artes na mahaharap sa kaso ang dapat na magdala ng patunay ang sinumang magki-claim na kanya ang pera.

Paliwanag niya, walang identification cards na kasama o pagkilanlan na magsasabi kung kanino ang pera, subalit maaari ding ma-validate dahil may hawak namang kopya ng CCTV footage ang MMDA para matukoy kung ang aangkin ay nagsasabi ng totoo.