P5.768 trilyong national badyet sa 2024, aprub na sa bicam

MANILA, Philippines — Inaprubahan na kahapon ng bicame­ral conference committee ang pinal na bersyon ng panukalang naglalaman ng P5.768-trillion national budget para sa 2024.

Sinabi ni Senate finance committee chairman Senator Sonny Angara na walang inilaang confidential at intelligence funds (CIF) sa non-security agencies sa consolidated version ng the 2024 General Appropriations Bill (GAB).

Sa kabuuang proposed budget, sinabi ni Angara na P9 billion o 0.02% ang inilaan para sa CIF sa 2024.

Sinabi ni Angara, chairman ng Senate Committee on Finance at senate contingent, na hatinggabi na sila natapos para ma-reconcile o mapagsama­-sama ang budget version ng Senado at Kamara.

Nagpasalamat din si Angara sa kapwa Senador at Senate President Juan Miguel Zubiri para sa tiwala at nagpasalamat din sa contingent ng Kamara na pinamumunuan ni Congressman Elizadly Co, co-chairman ng Bicam ang reconciled version ng panukala.

Ayon kay Angara, ang pinal na bersyon ng 2024 badyet ay tumutok sa kahalagahan ng depensa ng bansa.

Dahil dito, tinaasan ng bicameral conference committee ang badyet ng Philippine Coast Guard ng P2 bilyon.