Mga jobless na Pinoy nabawasan — PSA
MANILA, Philippines — Iniulat kahapon ng Philippine Statistics Authority (PSA) na bumaba ang bilang ng mga walang trabaho sa Pilipinas noong Oktubre kumpara sa nagdaang buwan.
Mula sa 2.5 milyong jobless noong Setyembre, bumaba ito sa 2.24 milyon noong Oktubre, katumbas ng 4.5 percent base sa isinagawang Labor Force Survey noong Oktubre.
“Ang unemployed persons o bilang ng mga nasa labor force na walang trabaho o negosyo nitong Oktubre 2022 ay nasa 2.24 million,” wika ni PSA chief Dennis Mapa.
Nabatid na ito na ang pinakamababang unemployment rate na naitala simula ng pre-pandemic noong Oktubre 2019.
Ayon sa PSA, ang services sector ang nanguna bilang top employer na may 59.2% porsyentong share sa labor market.
Sumunod ang sektor ng agriculture at industry sectors na may 22.5 porsyento at 18.3 porsyento.
Pero kung nabawasan ang bilang ng mga tambay sa bansa, bahagya ring bumaba ang bilang ng mga nagtatrabaho, mula 47.58 milyon noong Setyembre ay naging 47.11 milyon noong Oktubre.
Ipinaliwanag ni Mapa na ang bahagyang pagbaba ng labor force ay bunsod ng muling pag-aaral ng maraming kabataan.
- Latest