Pagpapaliban ng BSKE sa 2023, pinaboran ng Kamara
MANILA, Philippines — Ipinagpaliban ng Kamara ang nakatakdang Barangay at Sangguniang Kabataan Election (BSKE) sa Disyembre 5, 2022 matapos na bumoto ang House Suffrage and Electoral Reforms sa pag-usog nito sa Disyembre 4, 2023.
Sa ginanap na video conference ng komite sa pamumuno ni Rep. Maximo Dalog Jr. (Lone District, Mountain Province), 12 Kongresista ang pumabor sa panukala na ipagpaliban sa Disyembre ng susunod na taon ang pagdaraos ng BSKE sa bansa.
Ito’y sa gitna na rin ng pagsusulong ng ilang mambabatas na huwag munang idaos ang nasabing eleksyon upang makatipid ng pondo ang pamahalaan lalo’t malaki pa ang nagasta sa katatapos na May 9, 2022 elections.
Una rito, inihayag ng Comelec na kung ipagpapaliban ngayong taon ang pagdaraos ng eleksyon sa nasabing level ay tinatayang nasa P5 bilyon ang magagastos ng gobyerno.
Sumalungat sa botohan sina ACT Teachers Partylist Rep. France Castro at Kabataan Partylist Rep. Raoul Manuel sa katwirang tinatanggalan umano ng karapatan ang mga botante.
Gayunman, pinagtibay ng House panel ang mosyon na isagawa ang botohan sa Disyembre 2023 o tatlong taong termino na kung saan ang mga mahahalal sa puwesto sa Brgy. at SK polls ay magsisimula ang termino sa Enero 1, 2024 matapos ang Christmas break.
- Latest
