MANILA, Philippines — Pinaiimbestigahan na ni Philippine National Police (PNP) Chief, Police General Guillermo Lorenzo T. Eleazar ang pagkakasangkot ng siyam na heneral sa drug trafficking.
Ang kautusan ni Eleazar ay kasunod ng pagbubunyag ni Pangulong Rodrigo Duterte sa kanyang huling State of the Nation Address (SONA) na siyam na high-ranking police officials ang sangkot sa drug trafficking.
Tiniyak naman ni Eleazar na tututukan at bubusisiin ang kaso dahil walang lugar sa organisasyon ang mga pulis lalo na ang mga sangkot sa droga.
“Iimbestigahan nating mabuti ang bagay na ito. Aalamin at tutukuyin natin ang matataas na opisyal sa PNP na sinasabing sangkot sa iligal na droga,” ani Eleazar.
Una nang sinabi ni Surigao del Norte Representative Robert “Ace” Barbers na isusulong niya ang congressional inquiry sa pagkakasangkot ng siyam na general. - Joy Cantos, Mer Layson