Tren ng MRT-3, binandalismo
MANILA, Philippines — Isang tren ng Metro Rail Transit Line 3 (MRT-3) ang binandalismo kamakalawa ng gabi.
Ayon sa pamunuan ng MRT-3, lumalabas sa paunang imbestigasyon na dakong alas-8:35 ng gabi nang iulat ng isang train driver ang nakitang tren palabas ng Santolan station (Northbound), na may nakasulat na salitang ‘cranks’ sa kaliwang bahagi nito.
Ayon sa driver ng vandalized train, tumigil ang kaniyang minamanehong tren sa wayside area ng Magallanes station at Taft Avenue station upang maghintay ng signal, bago pumasok sa Taft Avenue station platform (Southbound).
Anang MRT-3, maaaring nakapasok sa Taft Avenue station ang mga suspek gamit ang kakadiskubre lang na damaged perimeter fence sa harap ng isang gasoline station.
Patuloy naman na ngayon ang ginagawang imbestigasyon ng MRT-3 sa insidente ng bandalismo.
“Ongoing din ang repositioning ng CCTV cameras for wider scope, para macover ang high-security risk areas sa linya nang hindi na maulit ang ganitong insidente,” dagdag pa ni Dir. Capati.
Aniya, nire-review na ang lahat ng CCTV camera upang malaman kung sino ang responsable sa naturang insidente.
- Latest
