Duque naging vaccinator, pero hindi nagpabakuna
MANILA, Philippines — Pinangunahan kahapon ng umaga ni Health Secretary Francisco Duque III ang pagbabakuna sa unang tumanggap ng Sinovac vaccine sa Lung Center of the Philippines (LCP) bilang hudyat ng vaccination program ng gobyerno.
Binakunahan ng kalihim si Dra. Eileen Aniceto, Pulmonologist at head ng LCP emergency room at pagkatapos ay sumunod naman ang 19 pang ibang health workers ng LCP.
Sa kabila ng anunsyo na magpapabakuna rin si Duque, hindi naman ito naisagawa dahil sa mas inuna muna ang mga nakalinyang mga doktor at staff ng ospital.
Bago ito, muling hinikayat ng kalihim ang publiko na magpabakuna na at huwag nang hintayin ang pagdating ng ibang brand ng COVID-19 vaccine.
Iginiit niya na sa buong mundo ginagamit ang Sinovac vaccine kung saan may 2.5 milyong doses na ang naiturok sa iba’t ibang bansa.
Sinabi pa niya na aabot lamang sa .0005% ang risk o panganib na maaaring idulot ng bakuna habang kung hindi magpapabakuna ay napakataas ng risk na magkaroon ng COVID-19.
Tiniyak din niya na may indemnification ang gobyerno sa mga magpapabakuna na magkakaroon ng seryosong epekto sa pamamagitan ng PhilHealth ang pagpapaospital ng pasyente at iba pang gastusin.
- Latest