Ina, 2 anak tinamaan ng kidlat

MANILA, Philippines — Namatay noon din ang isang 6-anyos na batang babae habang malubhang nasugatan ang kanyang ina at kapatid matapos na sila ay tamaan ng kidlat habang nakasilong sa isang bahay kubo sa tabi ng palayan sa Zone-2 San Roque, Brgy. Madawon, Nabua, Camarines Sur kamakalawa ng hapon.

Ang nasawi ay kinilalang si Rosaniel Balbuena Tormes. Habang nasugatan at patuloy na inoobserbahan sa ospital ang kanyang nanay na si Angelica Tormes, 29; at kapatid na si Angelyn Tormes, 13, pawang residente ng nasabing barangay.

Sa ulat, dakong alas-2:00 ng hapon ay naglalakad ang mag-iina nang biglang bumuhos ang malakas na ulan kaya’t sumilong sila sa isang kubo sa tabi ng palayan.

Nang kumidlat ay tinamaan ang bahay kubo na sinisilungan at grabeng nasapol ang paslit.