Obrero dedo sa kabaro
MANILA, Philippines — Patay ang isang 29-anyos na construction worker matapos saksakin sa leeg ng isa sa dalawa nitong kasamahan sa trabaho na kanyang kainuman sa loob ng construction site sa Cubao, Quezon City, kahapon ng madaling araw.
Ang biktima ay kinilalang si Regie Torre Viernes, may asawa, tubong Dilasag Aurora at stay-in sa pinagtatrabahuhang construction site na matatagpuan sa Lt 13, Blk 2, Saint Peter St., Brgy. Kaunlaran, sa Cubao.
Tinutugis naman ng mga otoridad ang suspek na si Loben Dianela, 30, at kasama nitong tumakas na si Rico Rosales, 25, kapwa stay-in din sa construction site.
Batay sa inisyal na ulat, nabatid na dakong ala-1:13 ng madaling araw nang maganap ang krimen sa 4th floor ng MC 88 construction site ng ginagawang townhouse sa nasabing barangay.
Sinabi ng testigong si Mark Manuel Pimentel na isa ring obrero, nagising siya dahil sa tawag ng kalikasan nang mapansing nag-iinuman ang biktima at mga suspek.
Nagulat na lamang umano siya nang patungo sa banyo ay makita si Dianela na may hawak ng patalim at umakyat sa ikaapat na palapag.
Makalipas lamang ang ilang minuto ay muli umano itong bumaba hawak pa rin ang kutsilyo na sa pagkakataong ito ay may bahid na ng dugo at mabilis na lumabas ng construction site kasama si Rosales.
Ipinagbigay-alam agad ni Pimentel sa kanilang foreman ang nasaksihan kung saan tinungo nila ang 4th floor at bumungad sa kanila ang nakabulagta at duguang si Viernes.
- Latest